Sören Hauser

Komunikando é un punto de encontro na música galega non subvencionada que vai para dous anos emitindo. Un foro de debate para cuestionar o panorama vixente, recoñecer carencias e crear unha rede estructural. En definitiva, un medio de socializar e democratizar a cultura e as expresións culturais.
A Galiza musical non é nova en experimentos colectivos: xa nos anos 90 o movemento Unión Bravú dera coa pedra no zapato: na Galiza había moitos grupos de rock que cantaban en galego, que compartían inquedanzas e gustos musicais, pero que non se coñecían entre eles. A Unión Bravú puxo en conexión a estos grupos entre si, heteroxénea e singularmente.
Daquela semente no ano 2000 xurdiu AMELGA (Asociación de Músicos en Lingua Galega), primeiro intento de asociación legal por parte de máis de 40 grupos de música que compartían a lingua galega coma medio natural de expresión. Pretendendo normalizar a lingua sen desmarcarse do obxectivo de promocionar a música pretendeuse crear un circuito de salas e concertos en Galiza, pero só se conseguiu a medias, pois viuse abaixo coincidindo co novo impulso que apareceu a finais do 2002, despois do coñecido como desastre do Prestige, que encheu de negrura, decadencia e falsidade o país.


Dentro da tremenda reacción popular contra as decisións políticas que se toman na xestión da catástrofe e as posteriores consecuencias, os músicos galegos volven ver unha oportunidade para asociarse e crear en común: nace a Plataforma contra a BURLA NEGRA, formada por todo tipo de axentes culturais galegos: poetas, actores, músicos, escritores, etc. A Plataforma ocúpase de organizar actos culturais de protesta contra a situación política do momento. Máis adiante, a plataforma mutará en asociación cultural (Arredemo, rede de información, acción e distribución a favor da cultura galega en xeral).
Pero a seguinte iniciativa musical colectiva non chegará ata o 2006; virá impulsada dende Catalunya e chamarase A Perloca. Neste Cd únense 19 grupos galegos e cinco invitados co obxectivo de promocionar a música en galego, dando lugar a toda unha serie de iniciativas dende a súa publicación.
O primeiro resultado é a presentación do Cd en Galiza mediante un concerto e unha serie de conferencias sobre a Per Loca Marítima, unha vía romana que atravesaba Galiza poñendo en contacto as súas xentes entre si, e que serve como simboloxía do que se pretende facer. Inmediatamente despois organízase a II Foliada no Ateneu Popular de Nou Barris, un barrio popular e traballador de Barcelona con forte presencia galega. Entre todo tipo de actos culturais ao longo de dous días e dúas noites hai dous concertos de grupos perloqueiros.
Mentras todo isto pasaba, a venda dos Cds autoxestionabase dende os mesmos grupos.
Boa parte dos beneficios serviron para montar o portal de komunikando.net, lugar de encontro musical que abrangue as novidades referentes a 50 grupos galegos e que conta cunha radio interna de difusión e co primeiro programa de televisión distribuido exclusivamente por internet: komunikando tv, dedicado exclusivamente á difusión e promoción.
Ademáis, komunikando.net actúa mediante un software libre, Joomla, protexido por GNU, e toda a súa información está baixo licenza Creative Commons. Toda unha declaración de intencións dunha comunidade aberta, inclusiva, lugar de encontro, de saída e chegada, de músicas tan singulares como comúns.